Bagenaba Saa Dua

Bagenaba Saa Dua:

Asaa Dua dee baga la puan ti ba wi’ira e ti bagenaba Saa Dua la, ze’ele la Dua Yikinɛ. Asaa Dua yuum eeri la tuuma ka nyɛta nyaa ɛ kiŋɛ Dagɔŋɔ tiŋa puan ti a ta bɔ bunɔ lem yire na. Asaa yuum ta bɔna Dagɔŋɔ tum la yuuma atã. Yuuma atã la puan ti Asaa yuum ta nyɛ Dagana ti a tibera nɛreba Dagɔŋɔ tiŋa la puan. Asaa yuum dikɛ amiŋa mɛ ta lem la budaa wa ti ba bɔna deti a ɛɛra tuna a tuuma la. Ba yuum lagum bɔna la bala ti budaa la yuum nyaa ta nɔŋɛ Asaa yele, yuum nyaa yele Asaa yeti, a lagum po suŋera e la a nyɛga wa tũ’a ti a tara tibera a nɛreba wa. Asaa yuum ka lobe zuo dee to’e la nu’usi siyi la pupeelum. Asaa la budaa wa yuum lagum tuna la tibegɔ tuuma wa la bala ti la ta paɛ yuuma atã ti Asaa yuum nyaa po mina nyɛga la tuuma fii.

Dagana la n yuum tiberi nɛreba basɛ mɛ ti tiŋa la nɛreba yuum nyaa nɔŋɛ a yele tiŋa la puan. Budaasi yuum bo'ori e lɔgerɔ mɛ suŋa suŋa ti pɔgesi me bɔ’ɔra e pa’asa deti pɔgesi la sisesi dugera dia kina bɔ’ɔra ba pa’asa. Dagana wa yuum nyaa nyɛla bala wum nyɛlum nyaa dɔla bilam gã la pɔgesi la. Budaa a yuum tari la a baga la pã’asa pɔgesi la gã deti ba sireba ka mina. A yuum gã pɔgesi la mɛ ta ta la ba kɔma pa’asɛ

A yuum nyaa gã ba bala la ta bɔ la pɔka ka yima puurɛ ti pɔka la sira nyaa soke a pɔga nyaa, ani n bo fu puurɛ la. Beni zuo, pɔka la sira yuum kiŋɛ la sore yuum mɔɔnɛ nyaa kulum, bala la zuo a yuum mi ti eŋa ka gã’arɛ a pɔga la gee nyaa ta bɔ’ɔra ka puurɛ. Bilam puan ti pɔga la yuum nyaa yeti la dela tiba la n bo eŋa puurɛ la.

Pɔka la sira yuum nyaa kiŋɛ la Dagɔŋɔ Naba yire ta yele Naba la yeti bunɔ la iŋɛ la bala. Tiŋa la Naba la yuum nyaa wi tiba la mɛ ti wa’am ti Naba la nyaa soke e yeti, pɔka wa yele la bala fum tari la dina? Tiba la yuum ka parum dee tɔgɛ la yelemɛrgerɛ yeti, la dela asira ti eŋa gã’arɛ la pɔka la mɛ.

Tiŋa la duma yuum nyaa nyɔkɛ tiba la mɛ ta pagɛ paka deon puan de gee la Asaa ma’a ti a bɔna yire la puan. Farefari duma n makɛ yele se’em la 'Ayima bua n ki ti ayima ziirɔ sɔɛ za’asum’ la zuo, Asaa n yuum nyaa sɔɛ tibegɔ la nyaa tibera tiŋa la puan. La yuum ka yuɛ ti Asaa yuum nyaa tari baga la za’a kulum Dua tiŋa puan na nyaa dɛna baga daana tibera nɛreba ti ba nyaa lebege wi’ira e ti Bagenaba Saa Dua.