Pɔgemɛŋerɛ Gurentiŋa

Pɔgemɛŋerɛ de la nimmu'urɛ la sɛla n pakerɛ yele nɛrawoo vom puan la tiŋa woo puan. Pɔgemɛŋerɛ de la pɔka n tai tara a yire bii a zinzaka suŋa suŋa ti dɛgerɔ kana bini.

Gurentiŋa so'olum, Pɔka san tana mɛŋera n pa'alɛ ti a sirum bi paɛ pɔka. Pɔgemɛŋerɛ me kɔ'ɔm dagena yelebila ti pɔka woo wan ta'am dɛna beni zuo di yɛla zo'e mɛ. Sɛla n wan pa'alɛ ti pɔka de Pɔgemɛŋerɛ n ŋwana tilum wa

Kɔma bisega puan. Pɔka san dɛna pɔgemɛnka, a ni bisera ka kɔma mɛ suŋa ti dɛgerɔ ka ka paara ba. A kɔma ka di ti dɛgerɔ bi'ira bura bura magesi wuu ayi'iri gee tiira ba'a.

Pɔgesɛka n mɛŋere da'aŋa kɔ'ɔm ana la filam saŋa woo la daarewoo. A wan piise ka da'aŋa, pɛ laasi la dugerɔ gee nyaa ta'am dugɛ dia. Ka ko'om dukɔ me ka maalum ki'ira dɛlemadɛtɔ bii li'inli'isi beni zuo, a kɔ'ɔm pɛɛra la bala daarewoo gee maalum ãgera kosumɔ.

Dagi bala ma'a gee pɔgemɛnka zinzaka me ka gai turema turema la bogerɔ ti saa ni ni ko'om gã zi'an woo beni zuo, a ni vaɛ la zigi di'ise di'ise ti samɛtɔ san bɔna, a iŋɛ salegɛ ti zinzaka la ga'a filam la wan iŋɛ se'em ti saa san ni, ko'om la ta'am zɔ tole.

A san ba'asɛ bilam, a wan vaɛ bole yakɛ daangoonsi'a n sagum la za'a ti si zɛ kankaŋi ka saara.