Abagerɛ Bola

Ze'ele Wikipiidiya

Abagerɛ Bola Anaafɔ de la yuunyuuna n ze'ele Dua ŋmi'ira kɔlegɔ. A yuuni la farefari yuuma dee ŋmɛ'ɛra kɔlegɔ la.

Abola ze'ele la Dua Akawiti Yɛmbɔya yire n bo Booŋo _Dua, Bɔlega so'olum puan. Abola yuum pi'ilum pɛɛbera la wia, adukiiŋa saŋa la pɛɛbera dɔla dusi. A yuum ta ze'ele bilam loŋe dɛna la basumbaana baana basera a taaba ti ba gɔ'ɔsera sukaam. Abola yuum ta ze'ele la baaŋa la puan nyaa nyɛ ti nɛreba ŋmi'iri kɔlɔ gee baana ti la za'asum ti a me nyaa po pɔbɛ kɔlegɔ la ŋmi'ira. Gee, sɛba baaŋa n yuum kɔ'ɔm za'asum bo e ti a pɔbɛ a kɔlegɔ la yuum de la amiŋa kiima Dubila Naba Ben la Aguy one n yese Nyaarega. Gee, eŋa n yuum pugum diŋɛ tana baana la, a yuum pugum ka ŋmɛ kɔlegɔ la yue gee zaŋɛ tana ŋmi'ira suŋa suŋa gee baana.

Bilam puan ti a nyaa yuum nyɛ Aguy one ti a yuum dikɛ e ti a dɛna a pa'ala, nyaa yuum biŋe amiŋa tiŋa ti Aguy one me yuum pa'ala e kɔlɔ ŋmi'a la ŋwana nima nima. Gee, la dagi la Aguy one la ma'a, gee sɛba n pugum dɛna kiinduma kɔlegɔ ŋmi'a puan la za'a ti a yuum siregera amiŋa bɔ'ɔra ba gee ti ba za'a yuum lagum pa'ala e.

Abola yuum pɔsɛ a kɔlegɔ la ŋmi'ira basera la a taaba ti ba kɔɔra, gɔ'ɔsa Sukaam, nɛra san di apɔga, de'eŋo n boi zi'an la kuurɛ sãn ta bɔna zi'an. A yuum iti ba la za'an la ti la dɛna la suŋerɛ suŋera nɛreba la la tiŋa la za'an gee ka ba'am tɔgera ligeri yɛla. Gee zina beere wa, kɔlegɔ la nyaa de la Abola nu'o tuunɛ ti a tuna nyɛta ligeri bisera a yiduma gee kelum tara tuna a tuuma. Zina beere, a kelum ŋmɛ'ɛri ɛɛra suŋera mɛ gee nyaa ɛɛra ligeri pa'asera. Se'ere n sɔi la, kɔlegɔ la n nyaa de a nu' o tuunɛ.

Daami ti ba yuum ni tari nua kina dikera Abola ti a ŋmi'ia, ti a ni ta ŋmɛ' ti ba dugɛ dia ti ba di gee ti daam san bɔna ti ba nyu gee ti nɛra woo lebera kula la, zina beere wa, ba kelum tara la nuo la nuu dikera e. Bii la san dɛna la buuri malema magesɛ wuu, kuurɛ, pɔgedire, bia yu'urɛ sika la malema asi'a. Gee la san dɛna la zina beere de'eno tuseto mageɛ wuu, "lanching", "passing out" la de'eno asi'a la, ba ni san yi e ti a kiŋɛ ba nyaa ni yɔ la ligeri bo e. Gee, ba ka le nyuura la daam la.

Viisegɔ lɔgerɔ[demese | demesego zia]