Akantiŋabisenyɛ

Akanɛ Atiŋa deti ba na kɔ'ɔm ŋmaa gi'i wi'ira ti Akanɛtiŋa bisenyɛ de la bagekara daana n tiberi nɛreba faara bii tɔ'ɔsa ba vom Kum nu'usi basera. A ze'ele la Zɔkɔ kaŋa tiŋa puan m boi Booŋo so'olum Bɔlega wa. A tiberi mɛ ti la sisa dee a tibegɔ la yu'urɛ n de Akanɛtiŋa bisenyɛ deti sɛba me wi'ira ti Abesenyɛ.

Akanɛtiŋa bisenyɛ yuum tiberi mɛ ti ba yɛta ayele tiŋa woo. A yuum tiberi la bã'ası n ka tari kãlɛ magesɛ wuu: Nɛra san zala, Abisenyɛ tiberi mɛ, tiim daana san lobe nɛra tii, Abisenyɛ to'ori basera mɛ, nɛra puurɛ n duni, nɛra Zuo n wageri, la bã'ası zo'e zo'e ti Abisenyɛ yuum tibera.

Dagi la bã'asi ma'an ti Abisenyɛ yuum tibera dee a yuum kelum suŋera nɛreba mɛ ti ba tara buuri, suŋera nɛreba ti ba lɛɛbere, suŋera nɛreba ti ba dita pɔgeba bii ɛla sireba, suŋera nɛreba ti ba zamesera gɔnɔ, suŋera nɛreba ti ba ugera bii ba kɔ'ɔra ti ba dia maala suŋa suŋa bɔ'ɔra ba, la yɛla zo'e zo'e

Akanɛtiŋa bisenyɛ yuum kelum ita a Baga la bɔ'ɔra nɛreba mɛ ti ba me kula gura bamiŋa bii ba me tara kula tibera nɛreba me ba tinsin la me puusin yele yele wuu satima la.

Abisenyɛ yuum tiberi nɛreba la bala la dee ita a Baga la bɔ'ɔra ba la ti nɛreba la me yuum lɛbera pu'usa e mɛ. Sɛba yuum tari la buusi, piisi, nii, le ligeri kina pu'usa e dee san dɛna nuusi la ki'ini, iŋi yuum de la saa ko'om Akanɛtiŋa yire Lɔgetunɔ wuu yuum de la lɔgeseto ti a me yuum tara suŋera amiŋa la ayiduma.