Avɛtaŋa
Avɛtaŋa de la tinganɛ bɔna via(vea) tiŋa la puan. A de la zoore ti kuga la tiisi kɔ'ɔm kaɛ e mum. Faara yiduma me kelum zɔna bini mɛ pu'usera, ba me kelum ŋmata dɔɔrɔ a zuo mɛ.
Tinganɛ la de la tiŋa yaaba n ni bɔna tiŋa la puan ti tiŋa la duma ka'asa Ko'om bɔ'ɔra e ti a gu'ura ba suŋa suŋa ti be'em bii yeletooro da po paara ba yoo yoo tiŋa la puan.
Tinganɛ la me kelum bisera ba mɛ ti ba nyɛta imma'asum, lɔgerɔ la buuri. Sĩɔ san paɛ nara ti saa niira deti saa ka niira bii ba pugum burɛ mɛ dee ti Wa'arɛ ze'ele ti Ki/si kiira, mɔga kuta, vireba kana, tiŋa la duma ni lagesɛ mɛ siŋɛ/kiŋɛ Tindaana yire ta kaasɛ bo Tindaana la ti a me nyaa dikɛ wanɛ tɔ̃begɛ zom. Zom la, a ka iti Ko'om ita bu puan, a tari la Zom pugero la zɔna tingani la ta kaasa dee fabela bɔ'ɔra Tinganɛ la. Yɛta yele yeti, tu sɔyaaba Tinganɛ n de fu, fu san sirum bɔna mɛ wuu fum n daa bo se'em la, da basɛ ti tu paɛ yire la kɛ'ɛŋa. Basɛ ti tu nɛ' la ma'aserɛ kule. Tuma ka nyɛ Ko'om nyu bala zuo ti tu ka bɔ'ɔra fu Zom Ko'om dee bɔ'ɔra fo Zom pugero ma'a la.
A nyaa sãn ka'ɛ ba'asɛ ti pɔgesi kelum Kinkɛleŋa buyi, butã puan la ti ba za'an nyaa kaasa kula. Ti Tinganɛ la san sirum kɛ'ɛm ti a basɛ ti saa ŋmɛ ba kula.
La me kelum dɛna la tinganɛ dina miŋa nuu puan ti solemiisi yuum da dee yeti ba wɛgɛ ti via (vea) tiŋa duma yuum ka nam bo ba dee yele ba ti la sisi mɛ ti ba koose ba yaaba bo saana, dee yaabeduma la Winɛ paŋa n kelum basɛ ti via (vea) tiŋa duma kelum tara tinganɛ n de yaabeduma kɛ'a zi'a la. Tinganɛ wa tari la yoko ti la ze'ele via (vea) mɔgerɛ la puan tari bala ta yese tinganɛ la puan, ti bia ta'am kɛ yoko wa puan siŋɛ bala ta yese mɔgerɛ la puan. Via (vea) duma me kelum tara tingambila n boi Gɔŋa ti a yu'urɛ dɛna Atugegene, tinganɛ wa tari tiisi ma'a, Gɔŋa duma me ni ka'aseri ko'om bɔ'ɔra tinganɛ wa mɛ zusera ima'asum, pɔgedire, bidɔgerɛ lɔgerɔ la ba zo'e zo'e dee dɔla bini pu'usera bɔ'ɔra Winɛ farafara la n iŋɛ sɛla bo ba la. Tinganɛ wa tari la de'eŋo zi'a ti kɔma sina dɛ'ɛna, dee me kelum tara zinzonɔ ti ba yula tiisi la zuon. Tiŋa wa duma puurɛ pee mɛ la tinganɛ wa n gu'uri ba yɛsera be'em, yeletooro la yeleyooro n daani tinsi kaɛ mum la, tinganɛ wa me kelum tara sim zo'e zo'e ti ba bɔna tinganɛ la tiisi yogero puan ita siiro ti tiŋa la nɛreba lɔta dita, ba san ni ta yeti ba ka'ɛ ko'om bo tinganɛ wa daarɛ, nɛra woo ni yɛɛ a fuo dee nyaa ta'am kɛ tinganɛ wa tiŋa, dee fu me san kelum tum la tumbe'o dee kɛ tinganɛ wa tiŋa, a wan basɛ ti a sim la dum sa'ɛ e ti a yese a tiŋa, pa'alɛ tii a ka boti dɛgerɔ bii tumbe'ero.