Buuri malema la tigere yɛla

Buuri malema bii kɔlekɛa de la sɛla woo ti Nɛreba tara ti a dɛna ba vom yɛla gee ita a ti a tana basera ti bɔkerɛ bɔna bama la nɛreba tiŋasuka. Yele-na wa lagum pa'asɛ la ba yɛm la ba sirasekerɛ puan, ba nu'usi tuuna , sɛla n nari la sɛla n ka nari.

La kelum pa'asɛ la ba daare woo malema wuu pu'usegɔ la tigere magesi wuu na'am bɔbega. Sɛla woo ti asaala n lagum bɔna tiŋa la puan dikɛ ti la dɛna a vom yɛla. La kelum pa'asɛ la sɛla woo ti asaala sakɛ sira tara a kankaŋi gee ita a ti la za'asum bo ba, ba vom puan ze'ele kuremi sa tari wa paɛ zina beere wa.

Malema teeri dɔla la buuri la n boti ti ba vom ana se'em saŋa woo puan . Wuu tu nyaa yɛɛri la futo dagi tankoleno.

Tu tari la bɔgera la tanlaasi ãgera ko'om gee dagi dugerɔ la sara. Tu nyaa ba'ari la kutewiiri, pupu gee zɔna lɔa gee dagi ti tu kina nama paara satinzaarɛ. Tu tari la walesi, niwusi pipa duma , telefoni la mɔbaali foni duma nyaa bɔ'ɔra lasebaari gee mɔɔla yɛla gee dagi tu zom gɔsegɔ yi buki so'olum bii mɔɔlɛ tu yɛla.

Buuri malema wa pu la butã

Sɛla n pugum bɔna

Dina de la yɛnsebo n pugum diŋɛ bɔna tiŋa la nɛreba puti'ira puan dɛna zamesegɔ bɔ'ɔra ba daami sa tari wa paɛ zina. La mi kelum pa'asɛ la lɔgeseto ti ba tara tuna ba tuuma gee malena ba malema. Di vuurɛ gi'a leni de la sɛla ti asaala iŋɛ biŋe yuuma sa ti la kelum bɔna tara tuulum ba vom puan. Wuu ba n mɛti yire se'em, pɔgedirɛ, kuurɛ malema, kua la ugere yɛla.

Sɛla n tari nimpiilum

Dina de la sɛla ti nɛreba la mɛsi tara ita ba vom puan ti la tara nyuurɔ bɔ'ɔra ba, pa'ala bama n boi ba tɔka se'em gee kelum tara nimpiilum. Yele-ana wa zo'e zo'e ni dɛna la lɔgeseto ti tu tara tu nu'usi ita. Magesi Wuu yagebegɔ, wuka, kurega pɛ'a la tuuma asi'a. La kelum pa'asɛ la tu yuuma, wa'a la nigeŋo. Daalum wuu nɛra n ni ki ti ba laɛ gee dikɛ futo pagelɛ zɔŋɔ zuo se'em la, pɔka n dɔgɛ ti ba pie sɔɔrɔ ta biŋɛ yire sadɔpuuŋa. Kuurɛ puan ti ba lu do'oŋo la pɔka San wa ta tiiɛ ka nu'o pa'alɛ winum gee pa'alɛ ka yese zi'a na.

Sɛla n gu'urɛ asaala vom

Kalam tɔgere la asaala n wan tara amiŋa se'em ti imma'asum la vom sumɔ paara e. Magesi Wuu ba n doli folese'ere zusera Na'ayinɛ nyɛta maalegɔ , alakiseri yɛla la a lɔgesegɔ , zula bu'a la naresum n de sɛla ba vom puan.