Danmɔlega Kɔ̃ka

Damɔlega Kɔ̃ka. Damɔlega de la Atibefãreŋa Dãam ti ba tara nyuura dee maala ba buuri yɛla.

Ba tari la kimɔlega, kirega bii kareyɛna kɔgera damɔlega wa. Ba ni pĩ la Ki dikɛ dabesa atã daarɛ ti i bule ya ti ba nyaa ni nɔm ba deele ti i ku'ɛ ti ba vaɛ tari kiŋɛ banɛka ta niim na. Ki ni bule ti ba nɔm ba, ba yu'urɛ nyaa ni lebege la kɛ. Ba nyaa ni niim la kɛ la wa'am wa yuɛ. Yuurɛ la, ba ni iŋɛ la kɛ Zom la iŋɛ Lɔkɔ n karegɛ puan iŋɛ Ko'om pa'asɛ nyaa gurege bu suŋa suŋa.

Ba nyaa ni dikɛ bu mɛ ta dugelɛ bugum puan ti bu kɔta ba guresera suŋa suŋa gura bu ta salegɛ/ bi'e ti ba zaɛ bu ze'ele ti beere yilegɛ. Daam la kɔka la pɔseri la zaanuurɛ. Beere la san yelegɛ ba'asɛ ti ba bisɛ ti bu mi'e ya ti ba nyaa silege bu le dugelɛ bugum puan dee nyaa ka'ɛ tiŋa bunɔ la n de bisi la nyaa iŋɛ tɛ'ɛrega (ba ni dikɛ la dɔɔrɔ pagelɛ taselaa zuo nyaa dikɛ gbinka tagelɛ di zuo) nyaa ka'ɛ iŋɛ bini tɛ ka'ɛ pa'asɛ dasebu m bo dukɔ la puan la nyaa dugɛ. Dugekaŋa la ba wi'ira ku la bĩ'isegɔ. Ba San bi'ise ba'asɛ, tu ni yi'ira daam la la dakunkunɛ. Ba nyaa ni zaɛ bu ze'ele mɛ ti bu ma'ɛ. Bu San ta ma'ɛ, ti ba iŋɛ dabilum(local yeast) iŋɛ bu puan ze'ele ti kele. Bu San kele ba'asɛ bu ka le dɛna dakunkunɛ yɛ'ɛsa. Bu san kele ba'asɛ ba nyaa ni yũ bu mɛ iŋɛ dugelesi bii kalinsi puan ti se'em san yeti a nyu, ba yuɛ wanɛ puan bo e.

Gee sɛba ka boti dabilum la bala la, dãam la m ma'ɛ ba'asɛ nan dɛna dakunkunɛ la, ba kan iŋɛ dabilum la iŋɛ gee nyu.