Mi'ilumsebo N Nari Ti Tu Tara Gulesera Sɔsega

BASIC SKILLS FOR FOR WRITING COMPOSITION.

Pi'ileŋɔ/ pa'alegɔ- introduction:

Tu San yeti tu gulesɛ bii tɔgɛ sɛla yele, tu ni kɔ'ɔm ka zoe ta kisege tiŋanpuuŋan. See ti tu ni bisɛ Sɔsega la bii tɔgum la tole/zuɔ. Magesi wuu nɛreba san seke taaba, na ni nan pu'usɛ mɛ gee nyaa kɛ Sɔsega puan. Ba ni ka sɔsera sɔsera ta gɔme pu'usa taaba. Ŋwana san pugum iŋɛ, la de la tintula n bala. Sɛla n ni dɛna yia daana de la "fu/ya, bulika, wuntɛɛŋa bii zaanyuurɛ. Ŋwana san ba'asɛ, fu nyaa wan nyɛ ti ba ɛɛra ti ba baŋɛ guum. Ba nyaa wan ze'ele la bilam ki'ira sɔsega la puan.

La de la bala ŋui Sɔsega gulesegɔ puan. Fu san yeti fu gulesɛ Sɔsega, la nari mɛ ti fu baŋɛ Sɔsega la zuo bii tole n de sɛla. Ŋwana ti fu wan ta'am pɔsɛ/pi'ilum bii pa'alɛ Sɔsega la zuo suŋa suŋa. Magesi wuu ba san yeti "pa'alɛ sɛla zuo n ta'asɛ ti kom kɔ'ɔm bɔna tumam Gureŋɔ so'olum wa". Fu kɔ'ɔm ka pɔsɛ ti "Nɛreba de la zinyageduma Gureŋɔ so'olum, sɛba dɛna dabugereba gee ti sɛba me kuregɛ gaŋɛ. Ŋwana iŋa tuuma ka tole nɛŋa, sɔna ti dia ka bɔna".

Fu san pɔsɛ ŋwana, fu kisege la tiŋasuka tɔgera. Fu gulesegɔ la kan tara tile bii zuo. Fum wan ta'am pɔsɛ se'em n ŋwana:

Yɛla zo'e zo'e m boi bii n iti Gureŋɔ so'olum ta'asɛ ti kom bɔna. Fu san pi'ilum ŋwana, fu wan nyɛ ti se'em n kaali fu Sɔsega la bɔta ti a kãalɛ tukɛ nɛŋa baŋɛ yelesi'a ti fu yeti fu yele.

Yelesunsebo n wan yagelɛ yelesemdaa wa zuo la ta'am dɛna wuu; "Yɛla miŋa asi'a bii itegɔ miŋa de la; sanire, timpelegere, dia biŋe, dia koosego, hia mi'ilum, dãbuka, samampu'usum la yaaba yɛla"

Fu san kãalɛ yɛla la biŋɛ wuu mam pa'alɛ se'em wa, la kelum pa'asɛ la pɔsega la zuo. Fu nyaa wan ta'am lɔɔsa yɛla diyima diyima gãresa pa'ala sɛla inŋa ti fum ti'isɛ ti yele-aŋa n ta'asɛ ti kom bɔna. Ŋwana, fu wan nyɛ ti fu Sɔsega la gã'ata bii tigesa suŋa suŋa.

Sɛla ti la kelum nara fu mina de la fu yɛla la nari ti a tuura dɔla la, la n nari se'em. La dagi fu tugum pɔsɛ tɔgera nɛreba n kooseri dia se'em yia gee tɔgɛ sanire yele, bii tɔgɛ dia biŋere zi'an yele ta ba'asɛ gee nyaa lebena tɔgera timpelegere yɛla pooren.

Tɔgum/Sɔsega la nyɔ'ɔ - body.

Fu san diŋɛ pa'alɛ fu Sɔsega la zuo, la de la fu nyaa kɔ'ɔm tɔ fu Sɔsega la nyɔ'ɔ. Da nan ɛɛra daara zi'a sa. Fu san nan dɔla daara, fu wan nyɛ ti fu ta koŋe fu gɔɛ fumiŋa. Ŋwana wan basɛ ti fu Sɔsega la ka ana suŋa bɔ'ɔra se'em n kelesi bii kãali.

Magesi wuu fu san loe la "sanire" ti fu tɔgɛ pa'alɛ sɛla ti fum yɛti sanire basɛ ti kom bɔna, nyaa nan kisege tɔgera ti.

" Tu San sige Kumaasi bɔba wa la tu wan nyɛ ti saasi niira saŋa woo. Hali, tu san pugum vurege du Tamalɛ bɔba wa na, saasi kelum niira bilam sɔna tumam Gureŋɔ so'olum wa........". Fu san bisɛ sɛla ti n makɛ zuon wa, sɛla ka boi bini pa'ala sanire n ta'asɛ se'em ti dia ka bɔna Gureŋɔ so'olum. Fu yeem daara la yoo. Fum nari ti fu kɔ'ɔm tɔ tɔgɛ se'em de la;

"Sanire de la yele kankaŋi bɔna Gureŋɔ so'olum basɛ ti dipɔ'ɔsegɔ kɔ'ɔm bɔna wuu. Yuunɛ puan, saa niiri la ŋmaresi sinuu ma'a gee ti siyopɔi la n gee la dɛna uunɛ. Ŋwana pa'ale ti sansɛka ti ba dikɛ tuna dia tuuma la paɛ sansɛka ti ba zɛ yoo gee dita. Pugum dagena bala ma'a gee warɛ ni pugum ta'am ze'ele, basɛ ti dia maalegɔ lebe pooren".

Fu san bisɛ Sɔsesɛka ti n makɛ zuon wa, fu wan nyɛ ti gulesa kɔ'ɔm tɔ tɔgera mɛ gee ka ɛɛra daara wuu yia gulesa la. Ŋwana n wan basɛ ti fu gulesegɔ la kina suŋa suŋa ti se'em n kaali la bɔta ti a kaala.

Kilesego/ba'adegɔ.

Sɔsega ka boi ti ba ni kɔ'ɔm sɔsɛ ta ba'asɛ ansinzele. Sɔsega woo tari ka ba'adegɔ zi'an mɛ.Ba makɛ yeti "ba san diŋe dɔgɛ fu, la gee la fu kum". Gee fu san diŋe pi'ilum Sɔsega, see ti ka tara ba'asegɔ zi'an.

Fu san bɔta ti fu ni ba'asɛ fu Sɔsega suŋa suŋa, yɛla asi'a m boi nara fu mina. A dela;

i. Fu ta'am Kilese fu Sɔsega la yelezuto la iŋɛ putɛdaasi puan (sammary).

ii. Fu ta'am dikɛ fu Sɔsega la ba'asegɔ la iŋɛ sokere puan. Magesi wuu; fum bisɛ yɛla wa ti n pa'alɛ ta tuɛ wa, Gureŋɔ so'olum nɛreba yeti ba doose la fole kuni piɛ kom wa?.

Fu ta'am le ee puti'irɛ bo fu Sɔsega la ba'asgɔ puan. Magesi wuu: Mam ti'isi ti Gɔmena ni tu mɔga ti ba kɔɔra uunɛ kom la wan bɔi ni la fasi.