Sadio Mané

Sadio Mane.

Ba yuum dɔgɛ e la 10/04/1992, 'Bambali Sedhiou Senegal' tiŋa puan. Sadio Mane dela booŋmɛnyaleŋa daana n boi 'Bundesliga' boole tigere la ti ba wi'ira e tii 'Bayern Munich' la. Ŋmɛ'a puan, budaa wa ni ŋmɛ'ɛra la nɛŋa bɔba ti solemiisi wi'ira tii 'forward' la dee a me kelum lagum bɔna Senegal tiŋa boole tigekatɛ la puan. Sedio Mane lagum pa'asɛ tiŋa wa za'a boole ŋmɛnyalesi duma la puan dee tumam Africa tiŋa wa puan, a le lagum dita mi'a mɛ boole ŋmɛ'a puan. A ta'am zɔta mɛ dee tara boole ŋmɛ'a nyaleŋɔ la za'a.

Mane boole ŋmɛ'a pɔsega kaŋekaŋi dela n yuum de yuum pia la a wɛi la (19yrs) la, ti a yuum pɔsɛ ŋmɛ'ɛra boole ŋmɛ'a weleŋo buyi zuo tigere n de Metz la, a yuum ŋmɛ la yuum yinɛ dee pisegɛ bini basɛ. A yuum basɛ bilam dee le ta kɛ la 'Austrian' boole tigere n de Red Bull Salzburg la 2012 yuunɛ la puan ti ba yuum yɔɔra e €4 miiliyɔn bii miiliyɔn ba naasi la. 2013 ta paara 2014 yuunɛ la puan ti ba yuum di mi'isi boole tigera la za'a de yuum to'e ba wɔ'ɔrɛ n de kapi la. Ba yuum ta ba'asɛ la, ti a yuum ta le kɛ solemitiŋa boole ŋmɛ'a tigere n de Southampton ti ba yuum yɔɔra e £11.8 miiliyɔn. 2015 yuunɛ la puan ti a yuum ta to'e wɔ'ɔrɛ yɛsera la bama la Aston Villa duma n yuum ŋmɛ'ɛri ti a di tɔtɔ boole ti solemiisi wi'ira tii, 'fastest hat trick' la.

2016 yuunɛ la puan ti Mane yuum sɛka 'Liverpool' duma wi'a ti a lagum pa'asɛ ba boole ŋmɛ'a tigere la puan n boi 'Premier League'. 'Liverpool' duma yuum yɔɔri e la £34 miiliyɔn.

Mane yuum suŋɛ 'Liverpool' duma ti ba paɛ ŋmɛ'a za'a daana la 2018 la 2019 puan, ti ba yuum koŋe mi'a dia dee yuum ta tagelɛ buyi daana zuo, dee Mane yuum ta di la mi'a bɔɔla dia puan, to'e wɔ'ɔrɛ n de salema tagetɛ ti ba wi'ira tii, 'Golden boot'.

2019 la 2020 yuunɛ boole ŋmɛ'a puan ti Mane yuum suŋɛ 'Liverpool' duma ti ba yuum di mi'a to'e wɔ'ɔrɛ ti la yuum dɛna pupeelum bɔ'ɔra 'Liverpool' duma se'ere n sɔi la, ba pɔsɛ ba boole ŋmɛ'a tigere wa la dela yuumpitã n ŋwana ti ba nyaa ta'am dita mi'a wa. Sakutega ŋmarega la 2021 yuunɛ la puan ti Mane yuum di bɔɔla tusa anuu 'Premier League' puan, ŋwana wa yuum basɛ mɛ ti a pa'asɛ butã daana zuo tumam Africa tiŋa puan.