Yu'urɛ Sika Farefari Buuri Puan (Naming Ceremony)

Yu'urɛ sika Farefari buuri malema puan de la tuulum bɔ'ɔra buuri la. Buuri malema wa pɔseri la bɔgerɔ eere bii ba ni ɛ la bɔgerɔ ti ba baŋɛ yaabesɛka n boti bii loe bia la ti ba dikɛ sigɛ e dee nyaa ta'am dikɛ bia la sigɛ yaaba la ti yaaba la nyaa dɛna bia la sigerɛ.

Ba san baŋɛ sigerɛ la ba'asɛ, ba nyaa ni gaɛ la nyɛga wa'am na iŋɛ bagerɛ dukɔ puan iŋɛ ko'om pa'asɛ bini dee nyaa bɔ dabeserɛ sigɛ bia la. Ba ni yi la kiinduma ti ba lagesɛ yire la puan, ba nyaa san lagesɛ ba'asɛ ti bia la ba/sɔ nyaa ni nyɔkɛ nua ti ba ka'ɛ bo bia la sigerɛ la dee nyaa tari bia la yise yiŋa na ti ba yizuo kiima nyaa ni yi bia la yu'urɛ bo zama woo.

Bagerɛ dukɔ ko'om la n nyaa wan dɛna kosebo ti pɔgedɔgesa la nyaa wan ita nyuusa bia la gura a sika de ti yaaba la me nyaa tara paŋa gura bia la, la a yire duma la za'an. Male-ana wuusa iti bɔ'ɔra la sigerɛ yu'urɛ dee yubo'ote malema la ka ba'am dɔla male-ana wa, waa wuusa bii male-ana wa za'an waabi.